मिसन र भिजन
हाम्रो भिजन
हाम्रो भिजन नेपाललाई आर्थिक रूपमा सम्वृद्ध, सामाजिक र आर्थिक रूपमा समतामूलक र राष्ट्रिय रूपमा स्वाभिमानयुक्त राष्ट्र बनाउनु हो। जहाँ राज्यले सुशासन, पारदर्शिता र जबाफदेहिता सुनिश्चित गरोस्, र नागरिकले जात, लिङ्ग, वर्ग वा भूगोलका कारण अवसरबाट वञ्चित हुन नपरोस्। शिक्षा, स्वास्थ्य, रोजगारी र न्यायमा सबैको समान पहुँच होस्। उत्पादनशील अर्थतन्त्रमार्फत आत्मनिर्भरता बढोस्, युवाले आफ्नै देशमा भविष्य देख्न सकून् र नेपालको अन्तर्राष्ट्रिय समुदायमा सम्मानित, आत्मविश्वासी र स्वतन्त्र पहिचान स्थापित होस्।
हाम्रो मिसन (दीर्घकालीन लक्ष्यहरू)
१. सम्वृद्धिको लक्ष्य: औद्योगिक र आर्थिक क्षेत्रका सरोकारवालाहरूको अध्ययन अनुसार १० वर्षमा नेपालको अर्थतन्त्रको आकार १०० अर्ब अमेरिकी डलरको बनाउन सम्भव छ। मूलत: पर्यटन, कृषि, सूचना प्रविधि, शिक्षा, स्वास्थ्य, ऊर्जा, उत्पादन र खानी तथा खनिजमा लगानी मार्फत यो लक्ष्य हासिल गर्न सकिन्छ भन्ने निष्कर्षको हामी समर्थन गर्छौँ।
२. समताको लक्ष्य: अबको दश वर्षमा नेपालको मानव विकास सूचकांक ०.८ पुर्याइनेछ। हालसम्म विभेदमा परेका जातीय, क्षेत्रीय, लैङ्गिक समूहको समेत मानव विकास सूचकांक कम्तीमा ०.७५ पुर्याइनेछ।
३. स्वाभिमानको लक्ष्य: सम्वृद्धि, समता र हरेक वर्ष श्रम बजारमा आउने करिब ५ लाख नवयुवाको लागि स्वदेशमै पर्यटन, सूचना प्रविधि र कृषिमा गुणस्तरीय रोजगारीका अवसरको उपलब्धतालाई हामीले स्वाभिमानयुक्त नेपालको प्रमुख आधार मानेका छौँ । नेपाली पासपोर्टको इज्जत विश्वभरि बढाउने हाम्रो लक्ष्य छ ।